मातृभूमि रिझाइद्यौ

 

 

नानीबाबु तिमी प्यारा ईशकै वरदान हौ

दिई ध्यान पढे राम्रो राष्ट्रकै स्वाभिमान हौ ! ।।१।।

सानालाई गरी माया गर मान बडाकन

गुरुलाई गरी श्रद्धा गुणग्राही सधैँ बन  ! ।।२।।

राम्रो आफूसँगै हुन्छ नराम्रो पनि साथ नै

गुण राम्रो सपारेर नराम्रोपन त्याग है ! ।।३।।

गढ्नुपर्दछ है भित्र श्रम तथा विचारमा

तैरिएका हुँदै हुन्नन् मुगामोती समुद्रमा ! ।।४।।

दृश्य पुस्तक हो खुल्ला ऋतु नै पढ्नुपर्दछ

बुझ्न उचाइको मर्म हिमालै चढ्नुपर्दछ !।।५।।

नानीबाबु तिमीभित्र लुकेको छ गुलाव नै

फक्र, फूल, उडी बास्ना ढाकिदेऊ अकाश नै ! ।।६।।

चारैतर्फ गरी खोज, रोज उत्साह सत्यको

ताजा तेज निकालेर राख इज्जत देशको ! ।।७।।

घामको पहिलो झुल्काजस्तै लाली फिँजाइद्यौ

ज्ञान–विज्ञान, विद्याले मातृभूमि रिझाइद्यौ ! ।।८।।

:नरेन्द्र पराशर