तिमी

तिमी गुराँसकी फूल, सौन्दर्यको छ के कमी  ?
तिमी माधुर्यकी मात, तिमी स्वप्निल छ्यौ अनि  !
।।१।।

विमल प्रेमको खोला भोला मुहारमा छ नि
ईश नै झुक्छ है हेर्दै तिम्रो अगाडिमा अनि  !
।।२।।

आफैँलाई कहाँ हुन्छ थाहा कस्तो छु है भनी 
तिमी छाया परेकी छ्यौ पानीमा जूनको अनि  ! 
।।३।।

हाँस्ता उसै तिमी प्यारी नहाँस्ता पनि के कमी  ?
जहाँ बस्छ्यौ जसो गर्छ्यौ उसै सुन्दर छ्यौ अनि  ! 
 ।।४।।

नदीमा फूलको थुँगा बहे झैँ भावना छ नि
तिनै भाव उठी उड्ने मीठो बादल हौ तिमी  !
।।५।।

एक्लो हुँदैन है प्रेम एकान्तमा रहे पनि
आनन्द लाग्छ है धेरै तिमी छेउ भए अनि  !
।।६।।

:नरेन्द्र पराशर
श्रिङ्गारसुधा कवितासङ्ग्रहबाट 
छन्द: अनुस्टुप्

चरीका आँखा

कुनै गाउँकी एउटी राम्री किशोरीको
हृदय बगैँचाभित्र
कल्कलाएर उम्रिएका रहररूपी दूबोका पातहरूमा
खासमा बैंसका कोपिलाहरूमा
उखरमाउलो चाञ्चल्यले
दिव्य लालिमा पोतिएको
प्रेमको तुलसी–मठमा
जसरी कविहरूले श्रद्धा देखे
त्यसै गरी मैले
मलेवा, हलेसा
हाँस र जुरेलीका आँखाहरूमा
सद्य– स्नात पवित्रता देखेँ
खासमा चराका आँखाहरूमा....!

भविष्यको गर्भमा
आइपर्ने लफुङ्गो जीवनसाथी नसम्झिएकी
भूतकालको बालापन बिर्सिएकी
कुनै गाउँकी
एउटी स्वच्छ किशोरीको
आँखाको आँगनमा उम्रिएका
अगणित स्वप्नपुष्पहरूमा
नाच्दै रमाएका कल्पनाका पुतलीहरुमा
जसरी कविहरूले कविता देखे
त्यसै गरी मैले जीवन गरिमा देखेँ
खासमा चराका आँखाहरूमा...!

:नरेन्द्र पराशर

शुभेच्छा

आँखामा ज्ञानको ज्योति झल्किँदैछ बरोबर

दाँतमा शीतका थोपा टल्किँदैछन् मनोहर ।।

गालामा वयको आभा लाली लावण्य प्राञ्जल

तिलझैँ दिव्य कोठीमा काव्य सौन्दर्य झल्मल ।।

तिम्रो मुस्कानमा जादु ओठमा छन् गुलाव नै

तिम्रो कोकिल बोलीमा मोहनी छ अचम्मकै ।।

मेघको रँङले राम्री प्यारी सौन्दर्यभावले

श्यामा, शान्त, तिमी शिष्ट, जाती छ्यौ है स्वभावले ।।

तिम्रै हो सपना सारा तिम्रै आकाश हो सबै

पखेटा फड्फडाएर उड माथि झनै झनै ।।

जितेकी छ्यौ सबैलाई प्रेममा हार्छ भावना

जय होस् ! जय होस् तिम्रो शुभेच्छा ! शुभकामना !!