सुनाखरी: प्रेम, जीजीविषा र सौन्दर्य

प्रेम चट्टानमा दिव्य कल्पनाकी सुनाखरी

झुन्डिन्छे सत्य-सौन्दर्य आविर्भाव हुने गरी

।।१।।

सपना प्रेम आनन्द जो बाँड्छे विपना सरी

चिम्ली आँखा सधैँ हेर्छु मुटुकी यो सुनाखरी

।।२।।

भीरमा न त आत्तिन्छे शून्य-एकान्तमा परी

मधु-माधुर्य मात्तिन्छे प्रेमसिक्त सुनाखरी

।।३।।

यही जीजीविषा प्यारी यही आत्मीय मञ्जरी

मूर्दामा भर्दछे प्राण यही प्यारी सुनाखरी 
।।४।।

: नरेन्द्र पराशर
छन्द : अनुस्टुप्