मृदु हरा लहरा पहरासँग
रजतका छतका छहरासँग
म त हिँडेँ कमलो र गुणी बनी
शिखरका खरका झुपडीमुनि !
विपिनमा मुरली खगमा बजी
विटपमा लटरम्मा सजिधजी
सुमन बन्न हिँडेँ म बनी धनी
शिखरका खरका झुपडीमुनि !
शहरका घरका भरमा परी
हृदयकी वसुधा मरुमा झरी
प्रकृतिका कृति ली म हिँडेँ छु नि
शिखरका खरका झुपडीमुनि !
रकमका कमका गम छन् न ता
चउरका उरका मन छन् त्यता
अब सनातन मुक्त हिँडेँ मुनि
शिखरका खरका झुपडीमुनि !
:नरेन्द्र पराशर
No comments:
Post a Comment