प्रोजेक्ट

काम गर्ने कुरा भन्दा गफ गर्न सिकाउँछु
विज्ञ-अनुभवी भन्दै आफ्नै मान्छे झिकाउँछु !

बालुवामा सधैँ हाल्छु पानी खुब मजासँग
‘पर्ख केही नयाँ हुन्छ’ चिप्लो बोल्छु सबैसँग !

‘आय-आर्जन’ को नारा बाख्रा पाल्न लगाउँछु
‘अनुगमन’ का लागि हेलिकप्टर पठाउँछु !

सरकारी सबै काम, कर्मचारी खराब छन्
फितला, भ्रस्ट छन् भन्छु आफू ‘लाखौँ’ उडाउँछु !

‘साना उद्यम’ मा ठूलो आम्दानी छ सिकाउँछु
‘मनिटरिङ्ग’ भनी फेरि ‘ठूलो थैलो’ झिकाउँछु !

‘प्रोपोजल’ बिना केही हुन्न भन्छु, पठाउँछु
भो ‘इम्प्लिमेन्टसन्’ भन्दै सही छाप हनाउँछु !

झोला तुम्लेट् भिराएर राम्री केटी खटाउँछु
बुढी हुन्छे, बिहे हुन्न ! नयाँ अर्की पठाउँछु !

फर्मेट्- ग्राफहरू चट्ट पार्छु, भर्छु, सजाउँछु
पावर् पोइन्ट् र ल्याप्टप् मै सारा काम सकाउँछु !

अनेकौँ थरिका नौला कार्यक्रम बनाउँछु
मन्त्रीलाई ‘पिलाएर’ आफ्नो कुरा भनाउँछु !

दिन्छु दिन्छु भनी हिँड्छु थैली च्याप्प समाउँछु
दिने तालिम मात्रै हो बाँकी आँफै कमाउँछु !

(नरेन्द्र पराशर) :