“तिम्रा पाउ पुज्छु प्रिया”

तिम्रा पाउ छुन्छु प्रिया
तिम्रा गोडा धुन्छु प्रिया

तिम्रा पयर पुस्छु प्रिया
तिम्रा चरण पुज्छु प्रिया !

बुद्धका जस्ता गोडा तिम्रा
गार्गीका जस्ता पाउ तिम्रा
क्रिष्णका जस्ता चरण तिम्रा
मीराका जस्ता पयर तिम्रा
अनि पो भाव विह्वल भई
हर्षातिरेकले
तिम्रा पाउ छुन्छु प्रिया !

तिमीले कुल्चिंदा पनि कमिलो मर्दैन प्रिया
तिमीले कुल्चिंदा पनि दुईपाते बिरूवा मर्दैन प्रिया
तिमीले कुल्चिंदा पनि बालुवामा डोब पर्दैन प्रिया
अनि पो नतमस्तक् भई
तिम्रा पाउ धुन्छु प्रिया !

तिमीले कुल्चिदिएको ढुङगामा पानी उम्रिन्छ प्रिया
तिमीले कुल्चिदिएको पानीमा कमल उम्रिन्छ प्रिया
तिमीले कुल्चिदिएको कमलमा प्रज्ञा उम्रिन्छ प्रिया
तिमीले कुल्चिदिएको प्रज्ञामा सन्यास उम्रिन्छ प्रिया
तिमीले कुल्चिदिएको सन्यासमा आत्मसाक्षात्कार उम्रिन्छ प्रिया
अनि पो दासजस्तै
तिम्रा गोडा पुज्छु प्रिया !!!