तिम्रो जवानी

छ भट्टीसमानै छ तिम्रो जवानी
 छ रातो ! छ तातो ! छ तिम्रो जवानी
कलाको कमालै छ तिम्रो जवानी
कहिल्यै नहार्ने छ तिम्रो जवानी…… !

गुलावी सदा जो उज्यालो जवानी
हिमाली उषाले सजेको जवानी
छ है पूर्णिमाले बलेको जवानी
कहिल्यै नहार्ने छ तिम्रो जवानी…… !

चिमोट्दा छ बल्ने छ छल्ने जवानी
निचोर्दा नगल्ने छ तिम्रो जवानी
नथाक्ने नरूक्ने छ तिम्रो जवानी
कहिल्यै नहार्ने छ तिम्रो जवानी…… !

नशा लाग्छ हेर्दा नशाको जवानी
दशा लाग्छ भुल्दा उषाको जवानी
सधैँ बैँसले क्या सजेको जवानी
कहिल्यै नहार्ने छ तिम्रो जवानी…… !

: नरेन्द्र पराशर
(छन्द: भुजङ्गप्रयात: ISS ISS ISS ISS )