“सम्मोहन”

म धान बालासँग लिप्त हुन्छु
म बैंस प्यालासँग दीप्त बन्छु

म चक्षुले चुम्छु विभात-प्रात
म हुन्छु सम्मोहित दृश्यसाथ !

झर्दैछ झर्ना मनभित्र धेर
उड्दैछ पन्छी मनमा चकोर
पग्लेर फैलेर निमग्नसाथ
म हुन्छु सम्मोहित दृश्यसाथ  !

न खेद छन् खै, न त छन् विषाद
बिलेर जान्छन् ॠतु-चक्रसाथ
नयाँ नयाँ नाटकका जमात
म हुन्छु सम्मोहित दृश्यसाथ !

म स्वादलाई अनि शब्दलाई
म स्पर्शलाई पनि दृश्य मान्छु
चैतन्य द्रष्टासँग हुन्छ मात
म हुन्छु सम्मोहित दृश्यसाथ !

:नरेन्द्र पराशर